სარჩევი
ტყავის ფეხსაცმელები – წყალგაუმტარობის მითი
ერთ-ერთი ყველაზე ფართოდ გავრცელებული მითის დამსახურებით, ადამიანების დიდ ნაწილს ტყავი ბუნებრივად წყალგაუმტარი მასალა ჰგონია. რეალურად, ტყავი წყალგაუმტარობის გარკვეული დოზით გამოირჩევა, თუმცა წყლისგან სრულიად დაცული არაა. იგი ფოროვან მასალას წარმოადგენს. შესაბამისად, იგი წყალს პირდაპირ არ გაატარებს, თუმცა მისი ფორები წყალთან ხანგრძლივი შეხების შედეგად შესაძლოა ზედმეტად დატენიანდეს და დაზიანდეს. ტყავის მიერ წყლის შეწოვამ შესაძლოა გამოიწვიოს მისი ფორმის დაკარგვა და საკმაოდ სერიოზული ლაქების გაჩენაც. ზემოხსენებული მითის გამო ადამიანები ტყავის ფეხსაცმელებს ხშირად არასათანადოდ იცავენ წყლის უარყოფითი ზეგავლენისგან.
ტყავის ფეხსაცმელი ბევრად უფრო წყალგაუმტარი იმ შემთხვევაში იქნება, თუკი მის ზედაპირს რეგულარულად დაამუშავებთ წყლისგან დამცავი სპრეით ან მსგავსი საშუალებებით. აღნიშნული პროდუქტები ტყავს წყლის უარყოფითი ზეგავლენისგან და ზედმეტი ნესტის შეწოვისგან დაიცავს. თუმცა, აღნიშნული მეთოდების გამოყენების შემთხვევაშიც კი სასურველია მოერიდოთ ტყავის ფეხსაცმელებით სველ გარემოში დიდი ხნით გაჩერებას.
ტყავის ფეხსაცმელი და ტყავის კონდიციონერის გამოყენების სიხშირე
ბევრი ფიქრობს, რომ ტყავის კონდიციონერის ხშირი გამოყენება ფეხსაცმელებს ფორმას დაუკარგავს და ტყავს ზედმეტადაც კი დაარბილებს. ასევე არსებობს მითი იმის შესახებაც, რომ ტყავის კონდიციონერის ხშირი გამოყენება ტყავის ფეხსაცმელების გაწელვას და სტრუქტურის გამრუდებას გამოიწვევს. ასევე საკმაოდ გავრცელებულია საპირისპირო მითი იმის შესახებაც, რომ ტყავს საერთოდ არ სჭირდება კონდიციონერით დამუშავება. თუმცა, რეალურად მსგავსი პროდუქტები ტყავის ფეხსაცმელებზე ზრუნვის საკმაოდ მნიშვნელოვან ასპექტად ითვლება.
ტყავი ნატურალურ მასალას წარმოადგენს, რომლისთვისაც ტენიანობის გარკვეული დონის შენარჩუნებაა საჭირო მისი ელასტიკურობისა და კომფორტულობის უზრუნველსაყოფად. ტყავში არსებული ბუნებრივი ზეთების ოდენობა დროთა განმავლობაში მცირდება, ფეხსაცმელების ხმარებისა და გაწმენდის შედეგად. ტყავის კონდიციონერის გამოყენება სწორედ აღნიშნული ზეთების განახლებას უზრუნველყოფს. თუმცა, აღნიშნული პროდუქტის გამოყენებისას აუცილებელია ბალანსის დაცვა, რადგან კონდიცირებისას ზედმეტად ბევრი კონდიციონერის წასმის შედეგად შესაძლოა ტყავის სტრუქტურის დარღვევა გამოიწვიოთ. შესაბამისად, ტყავის კონდიციონერის გამოყენება სასურველია რამდენიმე თვეში ერთხელ.
ტყავის ფეხსაცმელების გაპრიალება – საჭიროება თუ არჩევანი
არსებობს მითი იმის შესახებ, რომ ტყავის ფეხსაცმელები გაპრიალებას მხოლოდ ვიზუალური ესთეტიკის გაუმჯობესებისთვის საჭიროებენ. თუმცა, აღნიშნული პროცესი ზედაპირისთვის სიგლუვის დაბრუნებასთან ერთად, ტყავის დაზიანებებისგან დაცვაშიც გეხმარებათ. ტყავის გასაპრიალებელი საშუალებები ცვილს და საჭირო ზეთებს შეიცავს, რისი დახმარებითაც ტყავის ზედაპირზე დამცავი ბარიერის შექმნას უზრუნველყოფს. ეს თქვენ ფეხსაცმელებს ნესტისგან, მტვრისგან და ზედაპირის დამაზიანებელი სხვა ფაქტორების ზეგავლენისგან იცავს. ამასთანავე, გაპრიალება ტყავის პირველადი ფერის შენარჩუნებას და ხშირი მოხმარების შედეგად გაჩენილი მცირე ნაკაწრების დაფარვასაც უზრუნველყოფს.საუკეთესო შედეგის მისაღებად სასურველია, რომ ტყავის ფეხსაცმელები რამდენიმე კვირაში ერთხელ მაინც გააპრიალოთ. თუმცა, ყველა სახის ტყავის ზედაპირი მსგავსი ტიპის გაპრიალებას არ საჭიროებს. შესაბამისად, ფეხსაცმელების ყიდვისას მაღაზიის კონსულტანტებთან აღნიშნული საკითხის დაზუსტება საუკეთესო შედეგის მიღებას გაგიადვილებთ.
