სარჩევი
ტყავის ფეხსაცმელები და გაზაფხული – განახლების დრო
გაზაფხული როგორც გარდერობის, ისე ტყავის ფეხსაცმელების განახლებისთვის ყველაზე შესაფერისი დროა. ზამთრის სეზონი საკმაოდ დიდ გავლენას ახდენს ტყავზე, რის გამოც ცივი სეზონის მიერ გამოწვეული დაზიანებების გამოსწორება გაზაფხულზე აუცილებლობას წარმოადგენს. პირველ რიგში საჭიროა თოვლისა და წვიმებისგან დატოვებული ლაქების მოშორება. ფეხსაცმელების ზედაპირიდან ჭუჭყისა და მტვრის ნაწილაკების მოსაშორებლად შეგიძლიათ რბილი ჯაგრისი გამოიყენოთ. ამის შემდეგ, უფრო ურჩი ლაქების მოსაშორებლად საჭირო ტყავის საწმენდი საშუალებით ტყავის ზედაპირის გადაწმენდა. ქუჩებში თოვლის დასადნობად გამოყენებული მარილი ტყავის ფეხსაცმელებს განსაკუთრებით დიდ ზიანს აყენებს. აღნიშნული ნარევის მიერ დატოვებული ლაქების მოშორება ყველაზე აუცილებელია. ამისათვის შეგიძლიათ წყლისა და თეთრი ძმრის ნაზავში ამოვლებული ქსოვილი გამოიყენოთ.
ცივი სეზონისთვის დამახასიათებელი ცივი, მშრალი ჰაერი ტყავს ნატურალურ ზეთებსაც აშორებს. შესაბამისად, გაწმენდის შემდეგ აუცილებელია გამოიყენოთ ტყავის კონდიციონერიც. მასში არსებული ნივთიერებების წყალობით ტყავის ფეხსაცმელები პირვანდელ სახეს, ხოლო ტყავი ზეთისა და ტენიანობის საჭირო დონეს დაიბრუნებს. კონდიციონერის ბოლომდე შეწოვის შემდეგ, ფეხსაცმელების ზედაპირი შეგიძლიათ გააპრიალოთ რბილი ქსოვილის გამოყენებით.
ტყავის ფეხსაცმელი და ზაფხული – სიცხისგან დაცვის პერიოდი
გაზრდილი ტემპერატურა და ტენიანობა ტყავის გამოშრობის, გაუფერულებისა და გაბზარვის მიზეზად შეიძლება იქცეს. შესაბამისად, ზაფხულში ტყავის ფეხსაცმელები ასევე სპეციალური ტიპის მოვლას საჭიროებენ. პირველ რიგში აუცილებელია, რომ ისინი მოარიდოთ დიდი ხნით მზეში გაჩერებას. ულტრაიისფერმა სხივებმა შესაძლოა დროთა განმავლობაში ტყავის გაუფერულება და დასუსტება გამოიწვიოს. შესაძლებლობის ქონის შემთხვევაში, სასურველია ასეთ დროს ტყავის ფეხსაცმელები მოათავსოთ გრილ, დაჩრდილულ სივრცეში.
ამასთანავე, ტყავის დაზიანების თავიდან ასაცილებლად მნიშვნელოვანია დამატენიანებელი კონდიციონერის რეგულარული გამოყენება. ზაფხულის სიცხე ტყავს განსაკუთრებით აშრობს, რამაც შესაძლოა ბზარების გაჩენაც კი გამოიწვიოს. რამდენიმე კვირაში ერთხელ ფეხსაცმელების ზედაპირის დამატენიანებელი კონდიციონერით დამუშავება ტყავს ტენიანობასა და მოქნილობას შეუნარჩუნებს. ფეხსაცმელების ულტრაიისფერი სხივებისგან დასაცავად შეგიძლიათ გამოიყენოთ სპეციალური, მზის საწინააღმდეგო დამცავი სპრეიც.
მაღალი ტენიანობის გამო ობის გაჩენისგან თავის ასარიდებლად აუცილებელია, რომ ტყავის ფეხსაცმელები შეინახოთ ისეთ გარემოში, რომელიც კარგად ნიავდება. ამასთანავე, სასურველია ფეხსაცმელების შიგთავსში ჩადოთ ნესტის შემწოვი მასალა.
ტყავის ფეხსაცმელები შემოდგომასა და ზამთარში
გრილი ტემპერატურებითა და წვიმიანი ამინდებით ცნობილ სეზონებზე აუცილებელია წყლისგან დამცავი სპრეების გამოყენება. ისინი ტყავის ფეხსაცმელებს დალაქავებისგან დაიცავს. ამასთანავე, სასურველია ყოველი გამოყენების შემდეგ ფეხსაცმელების ზედაპირი გადაწმინდოთ სველი ქსოვილით, ჭუჭყისა და ნარჩენების მოსაშორებლად. ასევე, მათი დასველების შემთხვევაში მათი შიგთავსი უნდა ამოავსოთ ქაღალდით, რათა დააჩქაროთ გაშრობის პროცესი. ბზარების თავიდან ასაცილებლად, ფეხსაცმელების გაშრობისას მოერიდეთ სიცხის ისეთი პირდაპირი წყაროების გამოყენებას, როგორიცაა რადიატორები და გამათბობლები.
